كتب النائب أديب عبد المسيح على حسابه عبر منصة "إكس"، "برسم وزراء النقل والسياحة والداخلية ومحمد الحوت، وقفت متل غيري بالصف في مطار بيروت للتفتيش، هيدا المطار يلي بالموازنة كانوا ناسيين يخصصوا نفقات صيانة تليق به، ومحمد الحوت بضل يربّح منيّة إنو لولا "الميدل ايست" ما في صيانة".
وأضاف، "انتظرت ٢٠ دقيقة، مش هون المشكلة، خلال هذا الوقت مرق ٥ أشخاص خط عسكري، يعني ما انتظروا".
وأضاف: "إذا حسبنا كل ساعة بيمرق ١٥ شخصًا بالواسطة، يعني باليوم تقريبا في ٣٦٠ مسافرًا هودي عاللبناني، إذا حسبنا ٢٥٠ شخصًا مش قادرين ماديا يحجزوا صالون الشرف يلي بكلف ٢٠٠ دولار، هيدي خسارة مباشرة لمطار بيروت بقيمة ٥٠ ألف دولار باليوم، يعني مليون ونص المليون دولار بالشهر و ١٨ مليون دولارًا بالسنة خسارة للهوبرة، ناهيك عن الأذى المعنوي للأشخاص يلي عم يطبقوا القانون وأضف احتمالية التهريب والتهرب يلي ممكن يصير نتيجة مرور أشخاص مع "حماية".
وتابع، "هلق ممكن يطلعوا بعض الأشاوش ويقولوا ليش هيدا البوست وفي موسم سياحي، الجواب: احترموا العالم واضبطوا الفساد واعملوا مصاري للدولة في الموسم السياحي".
وختم، "أعتذر عن نشر صورة evidence لأني أحترم البدلة المرقطة".