فاطمة السَّيِّد_ خاص الأفضل نيوز
كنت دايما إسمع ستي الله يرحمها تقول: "الله لا يقعد رجال بالبيت"….
كنت صغيرة ما إفهم شو بتقصد، اتطلع فيها وقول: "حرام جدو"، واطلع فيه لقيه عم يضحك...
لما كبرت فهمت قديه ضحكته فيها بلاوي زرقا.... طبعا عم إحكي عن قصص التدبير المنزلي، إللي ببعض الأحيان بيحشر الرجل نفسه فيها، أو بيستهتر ببعض التصرفات بهدف الترتيب والمساعدة.. وطبعا عن حُسن نية.. ولكن إللي بيصر في حال ما كان عنده فكرة عن التدبير المنزلي مثل ما قال المثل:
"اجا ليكحلا عماااااها".
نصيحة لكل ست بيت، انطلاقًا من قصص حقيقية حصلت على مرأى العين.. أوعك تأمني وتتركي زوجك وحده بالمطبخ.. مثلا: يمكن يجي نهار وتلاقيه عم يستعمل شقفة تنشيف الصحون للأرض وللغاز وللطاولة وللمجلى والحيطان ويمسح الغبرة ، وممكن وإذا مستعجل وإجاه اتصال ضروري وبدو يضهر بفرد مرة بيمسح البوط عادي عادي بكل ضمير مرتاح..ما في اي مشاكل.. وإذا في حال كنت مضطرة وبدك مساعدته.. بنصحك تحضريلو الأدوات إللي حيستعملها، أو... حتلاقيه عم يحرك الأكل بخشبة الغسيل، ومجرد ما يشوف خشبة الفرم هونيك المصيبة.. بكييف وبينطلق.. بصير بدو يفرم كل شي.. فحددي شو بدك وإلا والله يمكن تلاقيه فرملك كيس الخبز.
أما عن غرقة القعدة فعطول تفقدي يرضى عليك... ورا الكنبيات داخل المزهريات تحت زوايا الطاولات، وما تتفاجئي إذا لقيتي هياكل عظمية تابعة لشي حبة فواكهة!!!!!
ممكن تلاقي ورق سندويشات، قشر مكسرات، بطاقات تشريج للتلفون، فواتير خالصة مدتها، أغطية قناني... يعني عندن هواية بدفن آثار الاشياء شي فظيع..لازم تعملي ورشة تنقيب، وتبقي عطول عم تلقي نظرة ع كل قرنة بالبيت بيقعد فيها..
ملاحظة: استدركي قبل ما يصير عندك ولاد وإلا بصير الوضع خارج عن السيطرة بتكوني بواحد بتصيري ب 1234... ولأنك إنت ست البيت ومسؤوليتك التنظيم والترتيب. فمسؤوليتك كمان إدارة كل فرد من أفراد البيت حتى يساعدوك بنجاح ويستلموا مهامن ويخففوا عنك.
ومثل ما بيقول المثل: "ابنك على ما ربيته وزوجك على ما عودتيه"
#خلي_عيونك_عشرة_عشرة